Chuchuk suvi eng kam bo'lgan 20 mamlakat

Jahon banki va Our World in Data ma'lumotlari asosida aholi jon boshiga to‘g‘ri keladigan chuchuk suv zaxirasi eng kam bo‘lgan mamlakatlar reytingi e'lon qilindi. Ro‘yxatda birinchi o‘rinni Quvayt egalladi. Tadqiqotga ko‘ra, Quvaytda doimiy daryo va ko‘llar mavjud emas. Shu sababli mamlakat ichimlik suvining asosiy qismini dengiz suvini chuchuklashtirish orqali ta'minlaydi. Ikkinchi o‘rinda Bahrayn, uchinchi o‘rinda esa Misr joylashgan. Reytingdagi 20 davlatning yettitasi Yaqin Sharq mamlakatlari bo‘lib, ularda yog‘ingarchilik kamligi va suv manbalari cheklangani sababli suv tanqisligi yuqori. Shuningdek, ro‘yxatdan Misr, Sudan, Liviya, Jazoir kabi Afrika davlatlari, shuningdek Singapur, Turkmaniston va Pokiston ham o‘rin olgan. Mutaxassislarning ta'kidlashicha, chuchuk suv tanqisligi qishloq xo‘jaligi, iqtisodiyot va aholini ichimlik suvi bilan ta'minlashga jiddiy ta'sir ko‘rsatadi. Shu bois ko‘plab davlatlar suvni tejash va uni qayta ishlash texnologiyalariga katta sarmoya kiritmoqda.

E'lon qilingan: 31-iyul, 2026