Jahon okeani kislorodni yo‘qotmoqda

Olimlar Jahon okeanida erigan kislorod miqdori tobora kamayib borayotganini aniqladi. Mutaxassislar bu jarayon endi faqat ekologik muammo emas, balki iqlim barqarorligi, biologik xilma-xillik va oziq-ovqat xavfsizligiga tahdid solayotgan global xavf ekanini ta’kidlamoqda. Tadqiqotga ko‘ra, XX asr o‘rtalaridan buyon Jahon okeani kislorod zaxirasining qariyb 2 foizini yo‘qotgan. Agar issiqxona gazlari chiqindilari keskin kamaytirilmasa, 2100-yilgacha okeandagi kislorod yana 1–7 foizga kamayishi mumkin. Ayniqsa, kislorod deyarli mavjud bo‘lmagan “o‘lik zonalar” soni keskin ortmoqda. Ochiq okeandagi bunday hududlar maydoni 4 barobardan ko‘proq kengaygan, qirg‘oqbo‘yi hududlarida esa 1950-yildan buyon ularning soni 10 barobardan ziyod oshgan. Kislorod tanqisligi baliqlar va boshqa dengiz organizmlarining yashash hududlarini qisqartiradi, ularning o‘sishi va ko‘payishini sekinlashtiradi hamda baliqchilik tarmog‘i va oziq-ovqat xavfsizligiga salbiy ta’sir ko‘rsatishi mumkin. Tadqiqotchilar kislorod yo‘qolishini sekinlashtirish uchun issiqxona gazlari chiqindilarini kamaytirish, oqava suvlarni samarali tozalash, qishloq xo‘jaligidan kelayotgan ifloslanishni qisqartirish hamda suv havzalarida kislorod monitoringini kuchaytirishni tavsiya qilmoqda. Tadqiqot natijalari Limnology and Oceanography ilmiy jurnalida e’lon qilindi.

E'lon qilingan: 31-iyul, 2026